सुदूरपश्चिम विश्वविद्यालयका स्थगित परीक्षा साउन ५ देखि सञ्चालन हुने

धनगढी: सुदूरपश्चिम विश्वविद्यालयका स्थगित परीक्षा साउन ५ गतेदेखि सञ्चालन हुने भएका छन्। 

दोस्रो लहरको कोरोना भाइरसको महामारी फैलिएपछि स्थगित भएका परीक्षा विश्वविद्यालय कार्यकारी परिषद्को बैठकले वैकल्पिक विधिबाट गर्ने निर्णय गरेको हो। 

विश्वविद्यालयका अनुसार स्नातक तह दोस्रो, चौथो र छैटौं सेमेस्टरका परीक्षाहरू साउन ५ गतेबाट सञ्चालन हुनेछन्। त्यस्तै स्नातक दोस्रो, चौथो र छैटौं सत्रका विद्यार्थीका अघिल्लो सेमेस्टरका कक्षाहरू जेठ २५ गतेदेखि वैकल्पिक विधिबाट सञ्चालन गरिने छ। 

प्रश्नपत्र लिखित, मौखिक र विश्लेषणात्मक उत्तर दिनुपर्ने किसिमको तयार पारिने बताइएको छ।