सुदूर नेपाललाई विश्वसँग जोड्दै

बुद्ध जन्मस्थलबारे पाठ्यक्रमको त्रुटि सच्याउन प्रधानमन्त्रीको आग्रह

२०७८ जेठ १२, ०८:१३ खबर संवाददाता

काठमाण्डौ – प्रधानमन्त्री केपी शर्मा ओलीले बुद्ध जन्मस्थलबारे कतिपय देशका पाठ्यक्रममा भएका त्रुटि सच्याउन आग्रह गरेका छन्। ५६५ औँ बुद्धजयन्ती र बुद्ध महापरिनिर्वाण तथा लुम्बिनी दिवसका अवसरमा शुभकामना दिँदै प्रधानमन्त्री ओलीले गौतम बुद्ध नेपालको लुम्बिनीमा जन्मिएको प्रामाणिक तथ्य भए पनि अझै कतिपय देशका पाठ्यक्रममा यसबारे गलत जानकारी रहेको भए सच्याउन आग्रह गरको हुन्। 

उनले भनेका छन्, ‘‘यस्ता कुराहरू नसच्चिएको भन्ने पनि सुनिन आएको छ। यस्ता त्रुटिहरू आजको वैज्ञानिक युगमा, सूचनाको युगमा त्रुटिहरू नै निरन्तर कायम राखेर बालबालिका वा नयाँ पुस्तालाई तिनै त्रुटिहरू पढाउनु वाञ्छनीय हुँदैन। त्यसकारण सत्य पढाउनेतर्फ, सत्य सिकाउनेतर्फ र बालबालिकालाई सत्य कुरा अवगत गराउने दिशातर्फ सबैको ध्यानाकर्षण गराउन चाहन्छु।’’

मानव जातिकै कारणले खलबलिएको शान्तिलाई मानव जातिकै सचेतता र सचेत प्रयासबाट शान्तिमा परिणत गर्न, शान्तिलाई कायम राख्न र शान्तिलाई दिगो बनाउन सकिने भन्दै उनले बुद्धका शान्तितर्फका चिन्तन, आदर्श र उपदेश अत्यन्तै सान्दर्भिक र महत्वपूर्ण रहेको बताएका छन्। 

‘‘नेपाल बुद्धकै जन्मभूमि हो र बुद्धिज्मको, बुद्धवादको, बुद्ध दर्शनको उद्गमस्थल पनि हो र शान्तिको सन्देश छर्ने थलो पनि हो। 

विभिन्न धार्मिक असहिष्णुता जस्ता कुराहरू, धार्मिक संकीर्णता जस्ता कुराहरूले बुद्धदर्शनका विरुद्ध अनेक क्रियाकलाप भए र बुद्धका शान्तिका सन्देशलाई यस धर्तीबाटै मेटाउन खोजिए।’’ सन्देशमा भनिएको छ, ‘‘तर बुद्धका उपदेशहरू, बुद्धको चिन्तन र बुद्धले देखाएको शान्तिको मार्ग र मानव जातिको सुखका निम्तिको उज्यालो मर्न सक्दैनथ्यो र मरेन।

तसर्थ फेरि बुद्धको जन्मस्थानको खोजी हुने परिस्थिति बन्यो। बुद्धको जन्मस्थान किन खोज्नु पर्यो? बुद्धका विभिन्न रिलिक्स(अस्तु) अथवा अवशेषहरू तिनीहरूको खोजीको महत्व र तिनको पवित्रताको बारेमा विश्वको ध्यान किन गयो? यी सबै कुरा मानव जातिको आन्तरिक आकांक्षा अथवा शान्ति र सुखको आकांक्षाबाट खोजी हुन थाल्यो।’’

उनले बुद्धको जन्म लुम्बिनीमा भएको र बुद्धवादको मुहान पनि त्यहीँ रहेको जनाउँदै जहाँबाट बुद्ध मानव जातिको जरामरण जस्ता कुराबाट मुक्ति कसरी हुन्छ भन्ने खोजीमा दरबार त्यागेर, सुखसयल त्यागेर बाहिर निस्किएका थिए, त्यहीँबाट बुद्धका चिन्तनको मुहान शुरु हुन्छ भने।

यसरी नेपाल बुद्धको जन्मस्थल र बुद्ध दर्शनको उद्गमस्थल भएको तथा यी तथ्यसम्म पुर्याउन र लुम्बिनीलाई आजको स्थितिसम्म ल्याइपुर्याउन योगदान गर्ने इतिहासका सबै महान पात्र एवं लुम्बिनीको विकासका सम्बन्धमा गुरुयोजना बनाउने टाँंगेलगायत महानुभावप्रति आभार व्यक्त गरे। 
 

कमेन्ट लोड गर्नुस