ओली पार्टीको भगौडा भएको नेता खनालको टिप्पणी
काठमाण्डौ – नेपाल कम्युनिस्ट पार्टी (नेकपा) को दाहाल–नेपाल समूहका वरिष्ठ नेता झलनाथ खनालले प्रधानमन्त्री केपी शर्मा ओली पार्टीको भगौडा भएको टिप्पणी गरेका छन् ।
शुक्रबार आफ्नो समूहको केन्द्रीय सङ्घर्ष समितिले प्रतिनिधि सभा विघटनको विरोधमा आयोजना गरेको विरोध सभामा सम्बोधन गर्दै वरिष्ठ नेता खनालले ओली नेकपाको भगौडा भएको टिप्पणी गरेका हुन् ।
नेकपा क्रान्ति र प्रतिक्रान्तिको विभिन्न श्रृङ्खला पार गर्दै ७१ वर्ष पार गरेको स्मरण गर्दै उनले केपी ओली कम्युनिस्ट आन्दोलनभित्रको घातक तत्त्व रहेको बताए । ओली नेकपाको अध्यक्ष बन्न लायक नरहेको उनको भनाइ छ । ओलीले सानो गुट बनाएर पार्टीलाई चोइट्याएको उनले बताए ।
नेकपा बलियो र सुदृढ भएको भन्दै सुदृढ पार्टीमा गलत मान्छे बस्न नसक्ने र ओलीले प्रतिगमन गरेका कारण पार्टीबाट आफै भाग्नुपर्ने अवस्था आएको नेता खनालको भनाइ छ ।
वरिष्ठ नेता खनालले प्रतिनिधि सभा विघटनलाई प्रधानमन्त्री ओलीले राजनीतिक कदम भन्ने गरेको भन्दै यो राजनीतिक कदम नभइ प्रतिगमनकारी कदम भएको बताए । प्रधानमन्त्रीले संविधानअनुसार चल्नुपर्ने उनको भनाइ छ ।
प्रधानमन्त्री ओलीले नागरिकले स्थिरताका लागि दिएको जनादेशविरुद्ध आक्रमण गरेको तथा संविधानलाई च्यातेर ध्वंसको थालनी गरेको नेता खनालको भनाइ छ । उनले नागरिक कतातिर छन् भनेर सडकमा आएर हेर्न प्रधानमन्त्री ओलीलाई आग्रह गरे ।
वरिष्ठ नेता खनालले संविधानले बनाएको सर्वोच्च अदालत भएकाले सर्वोच्चले संविधानबाहिर गएर कुनै व्याख्या विश्लेषण गर्न नमिल्ने बताए ।
सर्वोच्चले प्रतिनिधि सभा पुनर्स्थापना गर्नुको विकल्प नभएको उनको भनाइ छ । त्यसैगरी निर्वाचन आयोग पनि प्रचण्ड–माधवले नेतृत्व गरेको नेकपालाई नै आधिकारिक पार्टी भन्न बाध्य हुने उनले बताए ।
उनले प्रतिगमन नसच्चिएसम्म र केपी ओलीले घुँडा नटेकेसम्म कफन बाँधेर सडकमा उत्रिने बताए ।
