जापानद्धारा ७३ देशका नागरिकलाई प्रवेशमा प्रतिबन्ध
जापान सरकारले ७३ देशका नागरिकलाई प्रवेशमा रोक लगाएको छ। कोरोना भाइरसबाट सङ्क्रमित व्यक्ति आफ्नो देशमा नछिरुन भन्ने उद्देश्यले जापान सरकारले ७३ देशका नागरिकलाई प्रवेशमा प्रतिबन्ध लगाएको हो।
प्रधानमन्त्री सिन्जो आवेले थप ४९ देशबाट जापान भित्रिन प्रतिबन्ध लगाइएको बताए। प्रतिबन्ध लगाइएका देशहरुमा अमेरिका, क्यानडा, चीन, दक्षिण कोरिया, दक्षिण पूर्वी एशियाका सात देशलगायत रहेका छन्। अत्यावश्यक बाहेकका भ्रमणहरु नगर्न पनि प्रधानमन्त्री आवेले सबैलाई आग्रह गरेका छन्।
राजधानी टोकियोमा बुधबार कोरोना भाइरसबाट सङ्क्रमित थप ६५ जना भेटिएपछि प्रधानमन्त्री आवेले अन्तर्राष्ट्रिय आवागमनमा कडाइ गरेका हुन्। जापानमा मङ्गलबार पनि ७८ जना नयाँ बिरामी भेटिएका थिए। स्वास्थ्य अधिकारीहरुका अनुसार जापानमा अहिलेसम्म कोरोना बाट संक्रमितको संख्या झन्डै तिन हजार पुगेको छ भने ७८ जनाको मृत्यु भएको छ।
