सुदूर नेपाललाई विश्वसँग जोड्दै

चीनको उहानमा हुने सातौँ विश्व सैनिक खेलकूद प्रतियोगितामा पहिलो पटक नेपाली सेनाको पनि सहभागिता

। फोटो स्रोत ।
२०७६ कार्तिक १, ११:४० खबर संवाददाता

शुक्रबार देखि सातौँ विश्व सैनिक खेलकूद प्रतियोगिता महाशक्ति राष्ट्र चीनको उहानमा हुँदैछ। सो प्रतियोगितामा भाग लिन एक सय ५ मुलुकका उच्चस्तरीय प्रतीरक्षा अधिकारी, सैनिक र खेलाडी उहानमा पुगिसकेका छन्। इन्टरनेशनल मिलिटरी स्पोर्टस् काउन्सिल (सीआइएसएम) को समयन्वयमा यस पटकको गृष्मकालीन विश्व सैनिक खेलकूद प्रतियोगिता चिनियाँ जनमुक्ति सेनाले आयोजना गरेको हो। प्रत्येक चार वर्षमा हुने सो प्रतियोगितामा नेपाली सेनाले पहिलोपटक भाग लिएको छ। 

विश्वका सैनिकबीच हुने यस खेल प्रतियोगितालाई ठूलो तथा शक्तिराष्ट्रले निकै चासोका साथ हेर्ने गरेको पाइन्छ। खेल विधामा ४० नेपालीसहित विश्वका १० हजार ७१९ सैनिक खेलाडीले यस प्रतियोगिता प्रतिस्पर्धा गर्दैछन्। प्रतियोगिताको सम्पूर्ण तयारी पूरा गरिसकेको काउन्सिलका पदाधिकारीको आज बसेको बैठकमा जानकारी दिइएको छ।उहान शहर होलहरु अहिले विदेशी खेलाडीले भरिभराउ भएको छ।

मस्कट ‘वीङवीङ’ अर्थात् समुद्री माछा चयन गरिएको यो प्रतियोगितालाई सातौँ शान्ति खेलकूद नामाकरण गरिएको छ। नेपालसहित  विश्वका एक सय ५ मुलुकमा १० हजार ७ सय १९ खेलाडीको सहभागिता रहेको यो सैनिक खेलकूद प्रतियोगिता कात्तिक १० गतेसम्म सञ्चालन हुनेछ। यस खेलकूद प्रतियोगितालाई ओलम्पिकपछिको दोस्रो ठूलो खेलकूद  महोत्सवका रुपमा लिने गरिन्छ। प्रतियोगितामा दुई प्रदर्शनी खेलसहित २७ खेल समावेश गरिएको छ। यो प्रतियोगितामा विभिन्न विधा र समूहमा गरी तीन सय २८ वटा प्रतिस्पर्धा हुनेछन्। आठौँ राष्ट्रिय खेलकूद प्रतियोगितामा स्वर्ण पदक विजेता र उत्कृष्ट प्रदर्शन गर्ने खेलाडीले यस प्रतियोगितामा प्रतिस्पर्धा गर्दैछन्।

विश्व शान्ति कार्यमा व्यावसायिक, साहसिक र अनुशासित सुरक्षा फौजको रुपमा ख्याति कमाएको नेपाली सेना मुलुकको खेलकूद क्षेत्रको ‘राष्ट्रिय च्याम्पिन’ हो। उहान शहरको १२ वटा स्थानमा प्रतियोगिता सञ्चालन हुनेछ। प्रतियोगिता सञ्चालन हुने सबै स्थानमा मोटरबाट तीन सय ४० मिनेटभित्रै पुग्न सकिने दूरीमा रहनेछन्। ट्राइथलन भने ७९ किलोमिटर क्षेत्रसम्म सञ्चालन हुनेछ। प्रतियोगितामा विजयी खेलाडीलाई प्रदान गरिने पदकलाई ‘शान्ति र मैत्रीका तारा’ नाम दिइएको छ भने ट्रफीलाई ‘शान्तिको प्रतीक’को संज्ञा दिइएको छ।
 

कमेन्ट लोड गर्नुस