सेल्फी खिच्ने क्रममा चार जनाको मृत्यु

खवर संवाददाता
२०७६ असोज २१, ०४:३०
अ+

भरतमा सेल्फी खिच्ने क्रममा चार जनाको मृत्यु भएको छ। दक्षिण भारतीय राज्य तमिलनाडुमा एक नवविवाहित महिला र परिवारका तीन अन्य सदस्यले ‘सेल्फी’ फोटो खिच्नेक्रममा सरोवरमा डुबेर मृत्यु भएको प्रहरीले जनाएको छ। एकापसमा हात समातेर पाम्बार बाँधमा कम्मरसम्म पानी जम्मा भएको ठाउँमा उभिएर सेल्फी खिच्दै गर्दा एकजना अलि गहिरो स्थानमा पुगेर चिप्लिएका र उनले अन्यलाई पनि तानेको बताइएको छ।

सो नवविवाहित पुरुषले आफ्नो बहिनीलाई बचाउन भ्याए। तर, बाँकी सबै डुबेका बताइएको छ। सेल्फीको मोहले हाल दुर्घटना बढेको बताइन्छ। ‘द हिन्दू’ पत्रिकाकाअनुसार आइतबार कृष्णागिरीको बार्गुरका नवविवाहित जोडी उथानगराइ भन्ने ठाउँमा रहेका आफन्त भेट्न गएका थिए। साथमा दुलहाका बहिनी पनि थिइन्। साथमा अन्य तीन किशोर–किशोरी पनि रहेका जनाइएको छ।

सो दुर्घटनामा १४ वर्षीय किशोर चिप्लिए र सँगसँगै १८ र १९ वर्षका दिदीलाई आफूसँगै तानेको बताइएको छ। सन् २०११ र सन् २०१७ मा विश्वभर भएका सेल्फी मृत्युको संख्या दुई सय ५९ पुगेको थियो। जसमध्ये आधा भारतीय नागरिक रहेका बताइएको छ। भारतपछि धेरै सेल्फी दुर्घटना हुने देशहरूमा रुस, अमेरिका र पाकिस्तान पर्छन्।

भारतको हरियाणा राज्यमा मे महिनामा तीन किशोरहरूले रेलवे मार्गमा सेल्फी खिच्नेक्रममा अगाडिबाट आएको रेललाई छल्ने कोसिस गरेका थिए। तर, विपरीत दिशाबाट आएको रेलको ठक्करबाट उनीहरूको ज्यान गएको थियो। सोही वर्ष ओडिसा राज्यमा एकजना पुरुषले एक हात्तीसँगै उभिएर सेल्फी खिच्दै गर्दा उक्त हात्तीले सूँढले कसेर तिनको ज्यान गएको थियो। सामाजिक सञ्जालमा अरूलाई प्रभावित गर्ने प्रयासमा मानिसहरूले जोखिमपूर्ण सेल्फी फोटो खिच्ने गरेको भन्दै त्यस्ता व्यवहारविरुद्ध जानकारहरूले चेतावनी दिएका छन्।