अस्पतालमा विस्फोट हुँदा १० जनाको मृत्यु

अफगानिस्तानको दक्षिणी कलात सहरस्थित एक अस्पतालमा तालिबान लडाकुले गराएको विस्फोटमा परी १० जनाको मृत्यु भएको छ। विस्फोटक पदार्थले भरिएको मिनिट्रक अस्पतालको बाहिर विस्फोट गराइएको थियो। मृत्यु हुनेमा चिकित्सक र बिरामीहरु रहेको स्थानीय सन्चारमाध्यमले जनाएका छन्। विस्फोटका कारण अस्पताल ध्वस्त भएको छ। तालिबानले अस्पतालनजिकै रहेको सरकारी गुप्तचर निकायको कार्यालयलाई निशाना बनाएको जनाएको छ। अफगानिस्तानमा नजिकिँदो आमचुनाव र अमेरिकासँगको शान्तिवार्ता भंग भएपछि तालिबानले दैनिकजसो आक्रमणहरु गरिरहेको छ।