जासुसी गरेको आरोपमा यमनमा ३० जनालाई मृत्युदण्ड
जासुसी गरेको आरोपमा यमनको एक अदालतले ३० जनालाई मृत्युदण्डको फैसल्ला सुनाएको छ। विद्रोहीको नियन्त्रणमा रहेको यमनको राजधानी सानास्थित एक अदालतले साउदी गठबन्धनका निम्ति जासुसी गरेको आरोपमा ३० जनालाई मृत्युदण्डको फैसला गरेको हो।
मृत्युदण्डको सजाय सुनाइएकाहरुमा इस्लाहा पार्टीसँग आबद्ध रहेका प्राज्ञहरु, प्राध्यापकहरु र विद्यार्थी रहेका छन्। यमनमा यो समूहलाई मुस्लिम ब्रदरहुडको नामले चिनिन्छ। यी व्यक्तिलाई सन् २०१६ मा हुथी विद्रोहीको सुरक्षा अभियानका क्रममा पक्राउ गरिएको थियो।
नाम नबताउने शर्तमा एक अधिकारीले अदालतको आदेशका विरुद्ध अपिल गरिने बताएको अन्तर्रा्ष्ट्रि सञ्चार माध्यमले जनाएका छन्। एम्नेस्टी इन्टरनेशनलले अदालतको आदेश कानुनको उपहास भएको जनाउँदै गिरफ्तारीमा परेका सबैलाई तत्काल रिहा गर्न हुथी विद्रोहीसँग आग्रह गरेको छ।
यमनमा विगत चार वर्षदेखि इरान समर्थित हुथी विद्रोही र साउदी अरेबिया समर्थित तथा अन्तर्रा्ष्ट्रिय रुपमा मान्यताप्राप्त सरकारी फौजबीच भिषण युद्ध जारी छ। यमन युद्धमा हजारौंको ज्यान गइसकेको छ भने लाखौं मानिस घरबार छाडेर अन्यत्र पलायन भएका छन्।